लगातार १ सय १३ वर्षदेखि बलिरहेको छ यो बल्ब

 हामीले केही महिना वा वर्षको अन्तरालमा हाम्रो घरको कोठामा लगाइएका विजुली बत्ति बदलिराख्नु परे पनि अमेरिकाको क्यालिफोर्निया सहरको लिभरमोरमा रहेको वारुण यन्त्र गृहमा भने सन् १९०१ देखि एउटा बिजुलीबाट बल्ब लगातार बलिरहेको छ ।

ठ्याक्कै कुन दिन यो बल्बलाई बाल्न शुरु गरिएको थाहा नभएपनि सँधै जुन १८ का दिन यसको जन्मदिनका रुपमा मनाइने गरिएको छ । पछिल्ला १ सय १३ वर्षमा केही समय हुने उर्जा संकट बाहेक यसलाई २४ सै घण्टा बालेर राखिने गरिएको छ । यति लामो समयसम्म यस बत्तिले मात्र दुई पटक आराम पाएको छ । एकपटक सन् १९७६ मा एउटा वारुण यन्त्र गृहबाट अर्कोमा सार्दा र अर्को सन् २०१३ जब यसलाई ९३.४ घण्टा बन्द गरिएको थियो ।

 करिब ४० वर्षअघि यस बल्बको स्तानान्तरण गर्दा वारुण यन्त्रमा काम गर्नेहरुले फुट्छ भनेर यति सावधानी अपनाएका थिए कि उनीहरुले बल्बलाई निकाल्नुको साटो पूरै तारै निकालेर बोकेर हिँडेका थिए । यसलाई स्तानान्तरण गर्दा प्रहरी समेतले सुरक्षा दिएका थिए । त्यतिबेला स्तानान्तरण गर्न करिब २२ मिनेट मात्र लागेको थियो ।

 यस बल्बलाई अमेरिकी नेभल एकाडमीका फिजिसिस्ट डेबोरा काट्जले बनाएका हुन् । यसको आफ्नै विशेषताहरु रहेका छन् । यसलाई तयार गर्ने विधि पनि अरु भन्दा फरक रहेको छ । अन्य समान्य बल्बभन्दा यसको फिलामेन्ट ८ गुणा बाक्लो छ र यसको फिलामेन्ट पनि सेमिकन्डक्टर रहेको छ ।

 सबैभन्दा लामो समयसम्म बलेको यो बल्ब गिनिज बुक अफ वल्र्ड रेकर्डमा पनि दर्ज छ । यही बल्बको लागि भनेर छुट्टै लाइभ क्यामारा पनि जडान गरिएको छ ।