सुन्तलीसँग डेटिङ गईंन: धुर्मुस (अन्तरबार्ता )

नेपाल टेलिभिजनको हाँस्य सिरियल ‘मेरी बास्सै’मा अभिनय गरेपछि एकाएक चर्चामा आएका ‘धुर्मुस’ अर्थात सिताराम कट्टेल अहिले सिनेमाको नायक पनि भएका छन् । उनी सहित बिभिन्न हाँस्यव्यंग्य कलाकारहरुले अभिनय गरेको चलचित्र ‘छ एकाने छ’ को छायांकन अन्तिम चरणमा पुगेको छ ।
सिताराम र कुञ्जना घिमिरे अर्थात ‘सुन्तली’को जोडी दर्शकमाझ चर्चामा पनि छ । धेरैलाई सुन्तली र धुर्मुसको जोडी कसरी बाँधियो भन्ने जानकारी नहुन पनि सक्छ । अनलाइनखबरसँग कुराकानी गर्दै धुर्मुसले भने-’हाम्रो जोडी मेरी बास्सैको छायांकन स्थलमा फुलेर फक्रिएको हो ।’

धुर्मुसले सुन्तलीलाई दमन रुपाखेतीले निर्देशन गरेको ‘लौन सतायो’ नामक हाँस्य सिरियलको डमी छायांकनको क्रममा भेटेका हुन् । ‘तर लभ भनेर डेटिङ जाने, पार्कमा रमाउने काम भने गरिएन’ सुन्तलीसँगको प्रेमका विषयमा धुर्मुले भने-’हाम्रो प्रेम हाम्रै काममा मस्त थियो ।’
सुन्तलीसँग कहिल्यैपनि डेटिङमा नगएको धुर्मुसले बताए । ‘मैले उनलाई बाइकको पछाडिको सिट अग्लो बनाएर कम्मरमा अंगालो मार्दै डेटमा लगिन’ धुर्मुसले भने । धुर्मुस र सुन्तलीले प्रेम गरेको १ बर्षपछि बिहे गरेका हुन् । ‘काम गदर्ैै जाँदा एक अर्कालाई बुझ्यौं, घरपरिवारको बिषयमा जान्ने मौका पायौं, त्यसपछि मैले नै उनलाई बिहेको प्रस्ताव राखेको हो’ धुर्मुसले भने ।
बिहे भएको केही बर्ष बित्दा पनि धुर्मुस र सुन्तलीले सन्तानको बिषयमा सोचेका छैनन् । धुर्मुस भन्छन् -’काममा दुवैजना व्यस्त भएकाले यतातर्फ सोचिएको छैन, तर अब सोच्ने की भन्ने सल्लाह भएको छ ।’
उनले आफू र ‘माग्ने बुढा’ अर्थात केदार घिमिरेबीचको सम्बन्ध निकै सुमधुर भएको दावी पनि गरे । ‘हामीहरु यो बर्ष गाइजात्रा पर्वमा सँगै प्रहसन गर्दैछौं’ धुर्मुसले भने । अनलाइनखबर डट कमको सह प्रकाशन नेपाली खबरका लागि मलेसियाकाम नेपालीले सोधेको प्रश्नमा धुर्मुसको उत्तर ।
तपाइंको नाम धुर्मुस कसले जुराईदियो ? यो क्षेत्रमा कत्तिको सन्तुष्ट हुनुहुन्छ ? यस क्षेत्रमा आउन चाहनेहरुलाई कस्तो सुझाव दिनुहुन्छ ?
मैले आफैं जुराएको हो । मेरो चरित्र नै अलिकति ‘ग्वाँचे’ खालको थियो । यसैले पनि मैले आफैं नाम खोज्दा खोज्दै यो नाम जुराएको हो । म यो क्षेत्रबाट निकै सन्तुष्ट छु । किनकी मुख्यतया नाम ठूलो कुरा हो, जुन मैले पाएको छु । यस क्षेत्रमा आउनका लागि सबैभन्दा ठूलो कुरा अनुशासित र मेहनती हुनुपर्छ ।
तपाईले राजनीतिलाई कुन रुपमा लिनुभएको छ ? यदि देशको प्रधानमन्त्री भएमा पहिलो काम के गर्नुहुन्छ ?
राजनीति देश हाँक्न चाहिने छडी हो । तर यहाँ फोहोरी राजनीति धेरै नै भयो । यसैले पनि हामीले बढी राजनीति र कम काम गर्यौं जस्तो मलाई लाग्छ । यो अवस्थामा देशको प्रधानमन्त्री भएपनि केही गर्न सकिँदैन । यसैले म प्रधानमन्त्री भएकै दिनमा राजीनामा दिन्छु ।
तपाईलाई यो क्षेत्रमा ल्याउन प्रेरणा दिने व्यक्ति को होला ? सुन्तलीसँग कसरी भेट भयो ? अनि बाबु बन्ने रहर लागेको छैन ? सुन्तली प्यारो कि मेरी बास्सै ?
मलाई यो क्षेत्रमा श्याम शर्मा, जितु नेपाल र मेरो गाउँकै स्वर्गीय गणेश बिकले ल्याउनुभएको हो । मैले सुन्तलीलाई दमन रुपाखेतीले निर्देशन गरेको ‘लौन सतायो’ सिरियलको डमीको छायांकनमा भेटेको हो । मेरो लागि त दुवै उस्तै हो । तर सुन्तलीलाई मेरी बास्सैले जन्माएकाले यो सिरियल नै प्यारो लाग्छ ।
तपाईं र केदार घिमिरे (माग्नेबुढा) को सम्वन्ध कस्तो छ ? दिल खोलेर बताइदिनुहुन्छ कि ?
हामी दुईको सम्बन्ध अत्यन्त सुमधुर छ । हामी यो बर्ष सँगै गाईजात्रे प्रहसन पनि गर्दैछौं । यसैले पनि थाहा हुन्छ हाम्रो सम्बन्ध कस्तो छ भनेर । हाम्रो सम्बन्धको बिषयमा आवश्यकता भन्दा ज्यादा कुरा बाहिर आयो ।
तपाईं एक्लो मान्छे धेरै रोलमा देखिँदा असजिलो लाग्दैन ? कुन रोल गर्दा रमाईलो लाग्छ ? ‘खड्का जी’ पात्र कसरी जुर्यो ? एउटै कपडामा रोल खेल्दा खल्लो लाग्दैन ?
यस्तो खालको भूमिका गर्नका लागि असजिलो त धेरै नै हुन्छ । तर फरकफरक दर्शकलाई फरकफरक भूमिका मनपर्ने भएकाले पनि यस्तो गर्नुपरेको हो । मलाई ‘खड्का जी’ र ‘मुस्कान पासा’को भूमिका धेरै नै मन पर्छ । सिंगापुरमा कार्यक्रममा गर्न जाँदा महेश खड्काले यस्तै खालको भूमिका गर्नुभएको थियो । पछि मैले त्यो चरित्रलाई विस्तार गर्ने काम गरेको हुँ । फरकफरक लुगा लगाउँदा चरित्रको पहिचान नहुने भएकाले पनि यस्तो गरिएको हो ।
बिदेशमा श्रम गर्ने नेपालीहरुलाई तपाईं के भन्न चाहनुहुन्छ ?
देशको स्थिति राम्रो भएको भए बाहिर जानु पर्दैनथ्यो । तर पनि बिदेशमा राम्रो गरेर स्वदेशमा नै आउनुहोला भन्न चाहन्छु ।
कलाकारिता भन्दा अरु कुनै पेशा पनि अँगाल्नुभएको छ ?
त्यो बाहेक मैले बंगुर पाल्ने काम गरेको छु । अर्कोतिर शुभतार अस्पतालमा पनि म आबद्ध छु ।